Fjár­mála­ráð­herra veldur fyrr­verandi vara­for­manni Við­reisnar von­brigðum

Í fjármálaáætlun er til að mynda gert ráð fyrir að hækka skatt á fyrirtæki í fjármálageiranum. Nánari útfærsla skattheimtunnar hefur ekki verið kynnt en gert er ráð fyrir að innheimtan aukist um sex milljarða.

Í nýlegri greiningu IFS ráðgjafar er reiknað hvaða áhrif sú skattlagning myndi hafa á virði bankanna. Samkvæmt greiningunni myndi virði viðskiptabankanna dragast saman um í kringum fjögur prósent. Mestu áhrifin yrðu á Íslandsbanka en virði hans myndi dragast saman um 12,4 milljarða.

Þorsteinn Víglundsson, formaður Samtaka iðnaðarins og fyrrverandi ráðherra og fyrrverandi varaformaður Viðreisnar, segir það auðséð að auknar álögur muni bitna á kjörum almennings.

„Ég held að það sé algjörlega viðbúið að slíkur viðbótarskattur komi úr vasa heimila og fyrirtækja. Skattar sem lagðir eru á fyrirtæki auka kostnað þeirra og enda gjarnan hjá viðskiptavinum þeirra á endanum. Með sama hætti og breytingar á virðisaukaskatti til hækkunar eða lækkunar skila vöruverðsbreytingum til hækkunar eða lækkunar. Þetta virkar ekkert öðruvísi og algjörlega viðbúið að þetta endi á heimilunum og fyrirtækjunum.“

Hann ítrekar að nú þegar sé um erfiða stöðu að ræða fyrir byggingargeirann og telur að aukin skattheimta muni ekki bæta þar úr. Hann reiknar með enn frekari kólnun á komandi misserum.

„Það er viðkvæm staða núna á byggingamarkaði og þar er hvers kyns hækkun á fjármögnunarkostnaði ofan í þann samdrátt sem þar er að eiga sér stað mjög óheppileg og því til viðbótar áformar ríkisstjórnin að gera enn frekari breytingar til lækkunar á hérna endurgreiðslu virðisaukaskatts vegna vinnu á byggingarstað sem er bein kostnaðaraukning á íbúðarhúsnæði við mjög erfiðar kringumstæður.“

Hann segir það mikil vonbrigði að ríkisstjórnin hafi ekki brugðist við þeirri gagnrýni sem spratt upp þegar fjármálaáætlun var kynnt í vor. Hann bætir við að skattar á álögur séu nú þegar hærri en í samanburðarlöndum Íslands.

„Sér í lagi þegar horft er til þess að það er að teiknast upp mun erfiðara efnahagsástand en gert var ráð fyrir. Við þessar kringumstæður er bara mikilvægt að ríkið gæti aðhalds í eigin rekstri en leggi ekki viðbótarálögur á fyrirtæki og heimili. Þegar þessi ríkisstjórn var mynduð og þá var talað um stóraukið aðhald í ríkisrekstri, en því miður virðumst við vera að sjá fyrst og fremst stórauknar álögur á fólk og fyrirtæki og mjög víðtækar skattahækkanir sem gripið hefur verið til núna á þessu eina og hálfa ári sem þessi stjórn hefur verið við völd.“

Hann tekur fram að hann hafi miklar mætur á fjármálaráðherra og telur hann Daða hafa góðan og breiðan skilning á hagkerfinu. Niðurstaðan sé þó vonbrigði.

„Þetta er ríkisstjórnin í heild og málamiðlun þar á milli og auðvitað er í kringumstæðum eins og þessum alltaf þrýstingur úr einstökum ráðuneytum á aukin útgjöld. Það er alveg ljóst að það er ekki fjármálaráðherra einn sem ber ábyrgð á þessari fjármálaáætlun heldur ríkisstjórnin í heild og það veldur bara einfaldlega vonbrigðum að sjá að ekki sé stigið fastar niður gagnvart frekari útgjaldaþenslu.“

Hann segir að endurskoða þurfi nálgun ríkisfjármálanna frá grunni. Hann segir ríkisstjórnina ekki styðja með nægilega góðum hætti við atvinnulífið og hagkerfið í heild.