„Búinn að þroskast um fimm ár á þessu eina móti“

Gunnlaugur Árni er aðeins tvítugur, áhugakylfingur, en náði að vinna sig inn á þetta virta risamót sem talið er það erfiðasta. Shinnecock Hills völlurinn reyndist Garðbæingnum unga erfiður en hann lék seinni níu holurnar í gær þó afar vel, samtals á skolla, en endaði á +21 höggi, jafn öðrum í neðsta sæti.

Leika þurfti fyrstu tvo hringi mótsins á samtals +4 höggum til að komast í gegnum niðurskurðinn, eins og Gunnlaugur Árni ætlaði sér, en Birgir Leifur segir ljóst að síðustu dagar muni engu að síður gefa Gunnlaugi afar mikið fyrir framtíðina.

„Maður er bara gríðarlega stoltur af stráknum. Hann er búinn að komast ansi langt á stuttum tíma. Búinn að vera tvö ár í háskólanum og fékk núna gríðarlega reynslu í þessari viku. Ég held að hann sé að stækka um 4-5 ár í golfþroska, bara við þetta eina mót.

Þessi vika var rosalega mikið álag á hann og mikið af nýjum hlutum. Spennustigið magnaðist upp og svo lendir hann í smábrekku en nær að vinna sig upp úr því og hélt alltaf haus. Hann kom sterkur inn á seinni níu í gær og lokaði mótinu á fínum nótum,“ sagði Birgir Leifur.

Sjálfur náði Birgir Leifur langt í íþróttinni en þó ekki inn á neitt risamótanna, enda óhætt að segja að þræða þurfi nálaraugað til að komast inn á þau. En má binda vonir við að Gunnlaugur Árni mæti aftur á stærsta sviðið áður en langt um líður?

„Mikilvægt og jákvætt stökk inn í framtíðina“

„Hann er með allt sem til þarf að bera. Þarf bara að halda áfram því sem hann er að gera og bæta við einu og einu atriði. Engin risastökk því hann er hundrað prósent á réttu róli. Ég er gríðarlega stoltur af honum.

Það er frábært afrek að vera kominn inn á US Open svona ungur og næstu tvö ár verða ennþá meira þroskaferli. Hann getur alltaf bætt sig og þarf að líta á þetta sem gríðarlega mikilvægt og jákvætt stökk inn í framtíðina.“

Áhugi Íslendinga á framgöngu Gunnlaugs Árna hefur verið mikill og Birgir Leifur segir það vera eitthvað sem kylfingurinn ungi kunni að nýta sér.

„Ekkert mál að endanlega missa hausinn“

„Þetta er vítamínsprauta fyrir hann líka. Hann stefnir hátt og er búinn að vera eins og atvinnumaður hér heima í fimm ár líka. Hann hugsar rosalega vel um sig, er með flott teymi og foreldra á bakvið sig. Það skiptir máli að hann finni stuðninginn og traustið, að einhver grípi mann þegar hlutirnir ganga ekki alveg upp.

Það var gaman að vera á staðnum og sjá völlinn sem er náttúrulega alveg stórkostlegur. Það er mjög mikilvægt að hitta brautirnar því flatirnar eru alveg gríðarlega erfiðar. Dræverinn brást Gunnlaugi aðeins en hann hélt svakalega vel á spilunum fyrir utan það. Að koma svo svona sterkur til baka og finna taktinn var held ég rosalega mikilvægt fyrir hann. Hann náði að róa sig og finna spennustigið.

Svo sá maður það seinni daginn að menn eins og Dustin Johnson og Jon Rahm misstu taktinn. Það er rosalega stutt á milli á svona golfvöllum,“ sagði Birgir Leifur, ánægður með hvernig Gunnlaugur Árni vann sig upp úr sinni stöðu eftir erfiðar fyrstu 27 holur á mótinu.

„Það er ekkert mál að endanlega missa hausinn en þetta sýnir hvað hann er þroskaður. Mikið hrós á teymið líka sem hefur unnið með honum öll þessi ár, í GKG og GSÍ, og ég veit að Gauti Grétars [sjúkraþjálfari] er búinn að vinna mikið með honum í líkamlega þættinum líka. Hann er mjög fullmótaður kylfingur, svona ungur að aldri, ekki síst miðað við að alast upp á Íslandi þar sem ekki er hægt að spila golf tólf mánuði á ári. Hann hefur núna verið í tvö ár í bandaríska háskólagolfinu og er líka í frábærri umgjörð þar.“