Haf­þór Júlíus fer að­eins var­legar í næstu heims­met­s­til­raun

Fyrsta Enhanced Breakers-keppnin fer fram í beinni útsendingu þann 11. júlí næstkomandi í Los Angeles.

Þar mun Hafþór Júlíus Björnsson, „leikari, goðsögn og sigursælasti kraftamaður í sögu íþrótta,“ eins og hann er kynntur til leiks, reyna að slá eigið réttstöðulyftumet með 511 kílóa tilraun. Enginn maður hefur nokkru sinni lyft slíkri þyngd áður.

Núverandi heimsmet Hafþórs er 510 kíló en hann er heimsþekktur aflraunamaður, á 130 heimsmet, 32 alþjóðlega titla og var sterkasti maður heims árið 2018.

Hafþór reyndi við heimsmet á Steraleikunum en tókst þá ekki að lyfta 515 kílóum. Hann ætlaði að slá metið þá um fimm kíló en fer aðeins varlegar núna og lætur sem nægja að reyna bara að bæta það um eitt kíló í þetta skiptið.

Hafþór er einnig best þekktur fyrir hlutverk sitt í hinum margverðlaunuðu þáttum Game of Thrones, þar sem hann lék Fjallið.

„Þrátt fyrir að vera 37 ára gamall ögrar hann öldruninni og heldur áfram að verða sterkari þökk sé krafti frammistöðubætandi efna,“ segir í fréttatilkynningunni.

„Við erum ótrúlega spennt fyrir því að hefja Enhanced Breakers viðburðaröðina,“ sagði Max Martin, forstjóri Enhanced.

„Að Hafþór reyni við þyngd sem enginn maður hefur nokkru sinni lyft er nákvæmlega það augnablik sem skilgreinir fyrirtækið okkar – einstakir íþróttamenn sem þrýsta sér út fyrir það sem nokkur hélt að væri mögulegt. Þessi viðburðaröð gefur aðdáendum okkar meira af því sem þeir elska, veitir styrktaraðilum fleiri tækifæri til að virkja og eykur möguleika okkar á samþættingu vöru fyrir Live Enhanced vörukerfið okkar,“ sagði Martin.