Costa-bræðurnir eftir­sóttu völdu Flensburg

Costa-bræðurnir voru mjög eftirsóttir en Flensburg greindi frá því í dag að þeir hefðu samið við félagið til 2032. Þeir koma til Flensburg frá Sporting í Portúgal fyrir tímabilið 2027-28.

„Martim og Kiko eru meðal mest spennandi leikmanna sinnar kynslóðar. Þeir koma með handboltagáfur og ástríðu að borðinu og þrátt fyrir ungan aldur hafa þeir öðlast mikilvæga reynslu á alþjóðavettvangi. Á sama tíma eru þeir jarðbundnir og hungraðir í að ná árangri sem eru eiginleikar sem passa frábærlega inn í okkar lið og hugsunarhátt,“ segir Ales Pajovic, þjálfari Flensburg, í fréttatilkynningu á heimasíðu félagsins.

Viggó Kristjánsson gengur einnig í raðir Flensburg á sama tíma og Costa-bræðurnir. Viggó og Kiko spila báðir stöðu hægri skyttu en Martim er vinstri skytta. Sumarið 2027 hverfa Danirnir Simon Pytlick og Niclas Kirkeløkke hins vegar á braut.

Línumaðurinn Arnar Freyr Arnarsson gekk í raðir Flensburg frá Melsungen í sumar. Flensburg hefur einnig fengið sænska markvörðinn Simon Möller, franska leikstjórnandann Aymeric Minne og danska línumanninn Emil Bergholt sem hefur verið gerður að fyrirliða liðsins.

Costa-bræðurnir gengu í raðir Sporting frá Porto fyrir fimm árum. Martim er fæddur 2002 en Francisco 2005. Hjá Sporting leika þeir með Orra Frey Þorkelssyni.