Breki nýtir sér ráð Viktors og er klár í harðan slag í Portúgal

Breki gerði fjögurra ára samning við portúgalska stórliðið, eftir að hafa varið mark Fram með stakri prýði síðustu ár og meðal annars orðið Íslands- og bikarmeistari með liðinu á þarsíðasta tímabili.

„Fyrst hljómaði þetta mjög spennandi þannig að ég fór inn í viðræður og eftir viðræður var ég með virkilega góða tilfinningu fyrir þessu, og það leiddi til þess að ég ákvað að skrifa undir,“ segir Breki í viðtali við Stefán Árna Pálsson í Sportpakkanum á Sýn.

„Við byrjuðum 20. júlí og höfum verið að æfa og spila nokkra æfingaleiki. Þetta er bara búin að vera mjög góð reynsla hingað til og ég er virkilega spenntur fyrir framhaldinu,“ segir Breki en við hverju má búast nú þegar hann er mættur í harðan heim atvinnumennskunnar?

„Eins og ég sé þetta fyrir mér þá er ég bara að fara að berjast, sérstaklega þetta fyrsta tímabil. Þá þarf ég virkilega að vinna fyrir mínu sæti og það verður áskorun. Það er líka ástæðan fyrir því að maður er í þessu. Það er alltaf áskorun, sama hvar maður fer og hvar maður spilar.

Síðan ég var lítill krakki hef ég alltaf ætlað mér að fara út í atvinnumennsku. Ég er virkilega ánægður með að gera það hjá Benfica, þar sem ég fæ góða leiki í deild og líka Evrópukeppni sem ég tel mjög gott fyrir mig og hjálpa mér að bæta mig og verða að þeim handboltamanni sem ég vil verða,“ segir Breki.

Breki fór frá Fram í atvinnumennsku líkt og Viktor Gísli gerði á sínum tíma og Evrópumeistarinn hefur verið Breka innan handar:

„Ég hef verið lengi í góðum samskiptum við hann. Fengið margar ráðleggingar og átt mikil og góð samskipti við hann. Ég get alveg sagt að hann sé búinn að vera hvatning og stuðningur fyrir mig, enda hef ég litið mikið upp til hans frá því ég var ungur Framari. Hann er frábær gæi,“ segir Breki um landsliðsmarkvörðinn.