Eigin­kona og sonur vitni að grófri á­rás sjö stuðnings­manna FCK

Fjórir mannanna hlutu sex mánaða fangelsisdóm, tveir hlutu níu mánaða dóm vegna fyrri dóma, og einn hlaut fjórtán mánaða dóm eftir að hafa áður verið dæmdur fyrir sölu á kókaíni.

Dómara þótti ekki tilefni til þess að gera dómana skilorðsbundna og því þurfa mennirnir allir að sitja þá af sér á bakvið lás og slá. Verjendur íhuga nú að áfrýja dómunum.

Fórnarlambið hafði verið að styðja Bröndby í 3-3 jafntefli við AGF síðasta haust en þegar hann steig út úr bílnum við heimili sitt, á sunnudagskvöldi, réðust mennirnir sjö á hann.

Þorir ekki út eftir árásina

Þeir kýldu og spörkuðu í manninn á bílastæðinu, og stöppuðu á honum, þar til að hann varð meðvitundarlaus, en flúðu svo þegar eiginkona hans hringdi á lögreglu.

Maðurinn, sem er 42 ára gamall, hlaut áverka á höfði og hefur lýst því að hann óttist nú að fara út fyrir hússins dyr, og hafi ekki getað haldið áfram rekstri pípulagningarfyrirtækis síns. 

Hann mun hafa átt sér fortíð í helsta fótboltabulluhópi Bröndby, hópi sem Íslendingar kynntust þegar Bröndby sótti Víking heim í fyrrasumar, en slitið sig frá þeim félagsskap. Sem formaður stuðningsmanna Bröndby hefur maðurinn verið tengiliður við félagið sem og við lögreglu.

Mikill fjandskapur hefur ætíð ríkt á milli Bröndby og FCK. Liðin mætast á heimavelli Bröndby á sunnudaginn í mikilvægum leik í toppbaráttu dönsku úrvalsdeildarinnar.

Viktor Bjarki Daðason og Rúnar Alex Rúnarsson eru leikmenn aðalliðs FCK.