Hundrað marka Messi lét MLS-stjórann heyra það

Á meðan flestir voru uppteknir við að fagna 2-0 sigri Inter Miami gegn Cruz Azul, í meistaraleiknum á milli bandarísku og mexíkósku meistaranna, mátti sjá Messi láta Don Garber, framkvæmdastjóra MLS-deildarinnar, heyra það.

Ekki er ljóst hvað reitti Messi svona til reiði en hann gekk að minnsta kosti tvisvar að Garber og var með fingur á lofti þegar hann hreytti orðum í hann. Herculez Gomez hjá ESPN var á meðal þeirra sem deildu myndbandi af þessu.

Messi hafði annars ærna ástæðu til að gleðjast eftir að hafa unnið sinn 48. titil á ferlinum. Hann skoraði líka hundraðasta markið sitt fyrir Inter Miami, með frábærum skalla.

Messi átti svo hornspyrnuna á Casemiro sem skoraði seinna mark liðsins. Casemiro hefur skorað fjögur mörk í síðustu fimm leikjum.

Svo merkilega vill til að Messi skoraði einnig fyrsta markið sitt fyrir Inter Miami gegn Cruz Azul en það var í júlí 2023.