Siggi Raggi getur gert NSÍ að Færeyja­meisturum í dag

Íslenski þjálfarinn Sigurður Ragnar Eyjólfsson fór í víking fyrir ári síðan og tók að sér að vera þjálfari NSÍ Runavíkur.

Í dag getur hann skilað þessum litla bæ á Austurey aðeins öðrum meistaratitlinum í 69 ára sögu félagsins.

Það eru nítján ár síðan fyrsti og eini titilinn kom í hús eða árið 2007. Á þeim tíma var Sigurður Ragnar sjálfur að gera frábæra og sögulega hluti með íslenska kvennalandsliðinu.

Nú tók hann við liði sem endaði í þriðja sæti í deildinni á eftir KÍ Klaksvík og HB Þórshöfn.

NSÍ er með sex stiga forskot á KÍ Klaksvík þegar tvær umferðir eru eftir. Liðinu nægir því í raun jafntefli á móti HB Þórshöfn í dag en lokaumferðin fer fram um næstu helgi.

Leikurinn í dag er síðasti heimaleikur NSÍ en síðasti leikurinn er á móti B68 Toftir sem er hitt liðið á Austurey.

Það er gríðarlegur áhugi á leiknum í dag og búist við miklum fólksfjölda í þessum litla bæ sem telur undir þúsund íbúa en það eru þó yfir fjögur þúsund manns sem búa á svæðinu í kringum bæinn.