Innlent

Skeljungur biðst afsökunar

Gunnar Karl Guðmundsson, forstjóri Skeljungs, harmar þátt félagsins í þeim starfsháttum sem gagnrýndir eru í skýrslu Samkeppnisráðs um ólögmætt samráð olíufélaganna. Hann biður viðskiptavini Skeljungs jafnframt afsökunar. Í tilkynningunni segir orðrétt: Í þeirri hörðu umræðu sem nú fer fram um úrskurð Samkeppnisráðs um ólögmætt samráð olíufélaganna ber að undirstrika að þeir starfshættir sem gagnrýndir eru í skýrslunni heyra sögunni til og harmar félagið þátt Skeljungs í þeim. Skeljungur hf. starfar í dag í gjörbreyttu umhverfi og eru nýir eigendur komnir að félaginu sem á engan hátt tengjast málinu.Viðskiptavinir félagsins eru beðnir afsökunar á því sem miður fór á þessum árum og að nöfn sumra þeirra hafa að ósekju dregist inn í umræðuna.  Starfsfólk félagsins biðjum við einnig afsökunar á þeim óþægindum sem það hefur orðið fyrir síðustu vikur vegna þessa máls um leið og við þökkum góða framistöðu og samstöðu þess á erfiðum tímum. Skeljungur hf. leggur áherslu á heiðarlega og opna samkeppni þar sem virðing er borin fyrir hagsmunum viðskiptavina og annarra samstarfsaðila félagsins. Við ætlum okkur að endurheimta það traust sem glatast hefur.Gunnar Karl Guðmundsson forstjóri
Fréttir Innlent Samráð olíufélaga

Mest lesið


Fleiri fréttir

Sjá meira


×

Mest lesið