Valsstúlkur komnar í milliriðil

Íslandsmeistarar Vals eru að gera frábæra hluti í UEFA-bikar kvenna í fótbolta en þær unnu finnsku meistarana FC United, 2-1 nú síðdegis og eru komnar í milliriðil. Margrét Lára Viðarsdóttir skoraði bæði mörk Vals og kom þeim í 2-0, það fyrra úr vítaspyrnu á 16. mínútu en seinna á 41. mínútu. Valsstúlkur eru efstar í riðlinum eftir að hafa sigrað Röa frá Noregi mjög svo óvænt í fyrradag, 4-1. Valsstúlkur mæta Pärnu frá Eistlandi í lokaleiknum á laugardaginn og er sama hvernig sá leikur fer því Valur hefur betur innbyrðis gegn FC United og Röa sem koma næst. Pärnu tapaði fyrr í dag fyrir Röa, 9-1.