SWP meiddur

Enska landsliðið í knattspyrnu verður að vera án Shaun Wright-Phillips í æfingaleiknum við Dani í kvöld, en í gær var tilkynnt að hann færi ekki með liðinu til Danmerkur vegna þess að annað hné hans væri bólgið. Jermaine Defoe verður í framlínu Englendinga í leiknum, því Sven-Göran Eriksson vill tefla fram liði sem verður klárt í leikinn gegn Wales í september, en þá verður Michael Owen í leikbanni. "Enska úrvalsdeildin er auðvitað bara nýhafin, svo ég á eftir að sjá í hvernig formi leikmenn mínir eru. Ég hef fulla trú á þeim Rooney og Defoe í framlínunni og ég veit að þeir eiga eftir að klára sig vel," sagði sá sænski, en forvitnilegt verður að sjá hvort hinn ungi Darren Bent fær að sýna sig og sanna í leiknum í fjarveru Andy Johnson.