Sonur síðasta konungs Ítalíu handtekinn

Ítalska lögreglan handtók í gær Viktor Emmanuel, son Umberto annars, síðasta konungs Ítalíu. Emmanuel er grunaður um að hafa tekið þátt í skipulagðri glæpastarfsemi sem talin er teygja anga sína víða um lönd, meðal annars á sviði vændis. Fleiri nafntogaðir Ítalir voru teknir fastir, þar á meðal talsmaður Gianfrancos Finis, fyrrverandi utanríkisráðherra. Umberto annar varð konungur Ítalíu árið 1946 en mánuði síðar voru hann og fjölskylda hans rekin úr landi þegar Ítalir ákváðu að stofna lýðveldi.