Thuram setur met í kvöld

Varnarmaðurinn sterki Lilian Thuram hjá franska landsliðinu, setur franskt met í kvöld þegar liðið mætir Tógó í lokaleik sínum í G-riðli. Thuram spilar þá sinn 117. landsleik og slær met fyrrum félaga síns Marcel Desailly í landsliðinu.

Thuram hefur verið lykilmaður í vörn Frakka í fjölda ára og myndaði einhverja sterkustu varnarlínu í sögu keppninnar með þeim Lizarazu, Blanc og Desailly þegar Frakkar urðu heimsmeistarar árið 1998. Franska liðið tapaði ekki einum einasta af þeim 27 leikjum sem þessir fjórir menn spiluðu saman á sínum tíma og fengu þeir til að mynda aðeins tvö mörk á sig í keppninni árið 1998. Annað þessara marka kom úr vítaspyrnu þar sem Frakkar stilltu upp varaliði sínu eftir að hafa tryggt sig áfram úr riðlakeppninni.

"Ég er mjög ánægður fyrir hönd Thuram að vera að slá landsleikjametið, því hann hefur verið liðinu gríðarlega mikilvægur með leik sínum í gegn um árin. Hans var sárt saknað þegar hann hætti að leika með landsliðinu í 18 mánuði á sínum tíma, enda er hann atvinnumaður fram í fingurgóma," sagði Raymond Domenech, þjálfari franska landsliðsins.

Frakkar standa í ströngu í kvöld þegar þeir mæta liði Tógó í lokaleik sínum í G-riðlinum, en franska liðinu dugir ekkert minna en tveggja marka sigur til að komast upp úr riðlakeppninni og allt annað yrði hneyksli fyrir þetta sterka lið. Frakkar hlutu háðlega útreið á síðasta HM þegar þeir sátu eftir í riðlakeppninni án þess að skora mark og því er erfitt að ímynda sér hver viðbrögð frönsku þjóðarinnar verða ef sagan endurtekur sig í kvöld.