Kewell gat ekki leikið vegna gigtar

Talsmenn ástralska landsliðsins hafa gefið það út að miðjumaðurinn Harry Kewell hafi ekki geta spilað með liðinu í dag því hann þjáist af gigt. Talið var að það hefðu verið nárameiðsli sem voru að stríða leikmanninum, en nú hefur verið staðfest að hann var mjög kvalinn vegna ákveðnar tegundar gigtar.

Sjúkdómurinn lýsir sér þannig að sýrukristallar safnast saman í liðunum, oftar en ekki í stórutá, og ku þessi tegund gigtar vera einstaklega kvalarfull. Kewell ferðaðist um á hækjum í dag, en veikindum hans var haldið leyndum þar eð vonir stóðu til um að hann næði að hrista þetta af sér og spila.