Ekki í hefndarhug gegn Portúgölum

Sven-Göran Eriksson, landsliðsþjálfari Englendinga, segist ekki vera með hefnd í huga þegar lið hans mætir Portúgal í 8-liða úrslitunum á HM á laugardaginn. Portúgalar slógu Englendinga út úr Evrópukeppninni fyrir tveimur árum.

"Við erum með betra lið í dag en við höfðum fyrir tveimur árum og þess vegna hef hvorki ég né leikmennirnir neitt að óttast í þessum leik. Sumir vilja stilla þessum leik upp sem einvígi mín og Scolari (þjálfara Portúgal), en ég hlusta ekki á slíkt og trúi því innilega að við munum vinna á laugardaginn," sagði Eriksson, sem hefur þurft að sætta sig við að falla úr keppni fyrir liði sem þjálfað er af Scolari tvö stórmót í röð. Englendingar féllu úr keppni fyrir Brasilíumönnum á HM árið 2002 og Portúgal á EM fyrir tveimur árum.