Mikil gagnkvæm virðing í leiknum á morgun

Luiz Felipe Scolari segist eiga von á skemmtilegum leik um þriðja sætið á HM á morgun, þar sem hans menn Portúgalar mæta heimamönnum Þjóðverjum. Scolari segir þessi lið bera mikla virðingu fyrir hvort öðru.

"Ég hefði auðvitað miklu frekar viljað spila í úrslitaleiknum, en leikmenn mínir geta verið stoltir af því hvað þeir eru komnir langt í keppninni. Þetta verður leikur tveggja liða og þjálfara sem bera mikla viðringu hvor fyrir öðrum. Það eru engin tossaverðlaun að vinna brons á HM og því tel ég líklegt að mínir menn mæti jafn einbeittir til leiks og í fyrri leikjum á mótinu," sagði Scolari.