Ég er enn í rusli

Þýski markvörðurinn Jens Lehmann segist enn vera í rusli eftir að hafa misst af því að fara í úrslitaleikinn á HM. Hann segist ekki vita hvað framtíðin ber í skauti sér varðandi landsliðið, en ítrekar að hann vilji ólmur hafa Jurgen Klinsmann áfram í starfi landsliðsþjálfara.

"Mér leið hörmulega eftir tapið gegn Ítölum, en ég verð að viðurkenna að tilfinningin hefur aðeins versnað. Vonbrigði mín í ár hafa verið gríðarleg og það er sannarlega erfitt að kyngja því að hafa misst af tveimur stórum titlum á skömmum tíma," sagði Lehmann, sem tapaði sem kunnugt er í úrslitaleik meistaradeildarinnar með Arsenal.