Zidane dæmdur í þriggja leikja bann

Franski knattspyrnumaðurinn Zinedine Zidane var í dag dæmdur í þriggja leikja bann og gert að greiða rúm 3000 pund í sekt fyrir að skalla ítalska varnarmanninn Marco Materazzi í úrslitaleiknum á HM á dögunum. Materazzi fær tveggja leikja bann fyrir að ögra Zidane.

Zidane lagði sem kunnugt er skóna á hilluna eftir HM og þarf því ekki að taka leikbannið út, en hefur fallist á að vinna samfélagsþjónustu á vegum FIFA í staðinn. Bæði Zidane og Materazzi hafa beðist afsökunar á hegðun sinni. Materazzi þarf að greiða rúm 2000 pund í sekt, því þó hann hafi neitað að hafa sagt það sem borið hefur verið upp á hann - hefur hann viðurkennt að hafa storkað Frakkanum.