Bergkamp kveður á morgun

Það verður mikið um dýrðir á nýja Emirates-leikvanginum í London á morgun þegar Arsenal vígir völlinn með sérstökum kveðjuleik fyrir Hollendinginn Dennis Bergkamp sem leikið hefur með liðinu í 11 ár. Arsenal mætir þar hollenska liðinu Ajax og verður leikurinn sýndur beint á Sýn klukkan 16.

"Félag eins og Arsenal á skilið að fá svona glæsilegan völl og það verður leiðinlegt að fá ekki að vera partur af liðinu í framhaldi af því. Ég er hinsvegar búinn að njóta þess til hins ítrasta að vera partur af liði Arsenal í gegn um árin og kveð liðið með söknuði," sagði Bergkamp sem gekk í raðir Arsenal frá Inter Milan árið 1995, en hann hóf ferilinn einmitt með liði Ajax í heimalandinu á sínum tíma.