Kynlíf og leikjatölvur ástæða daprar frammistöðu á HM

Breska slúðurblaðið The Sun hefur það eftir franskri unnustu brasilíska knattspyrnusnillingsins Ronaldinho að slaka frammistöðu hans á HM megi rekja til þess að hann eyddi mörgum nóttum í að stunda kynlíf og leika sér í tölvuleikjum á meðan á keppninni stóð.

Alexandra Paressant segist hafa brotið reglur brasilíska landsliðsins með því að lauma sér inn á hótelherbergi til bónda síns á kvöldin. Þar sagði hún þau hafa stundað kynlíf fram eftir nóttu og eftir það hafi Ronaldinho gjarnan skellt sér í leikjatölvu sína, þar sem hann átti helst að hafa spilað fótboltaleik tileinkaðan HM 2006.

Kærastan bætti því við að þó bóndi sinn hefði verið gagnrýndur nokkuð fyrir frammistöðu sína á mótinu, hafi sér þótt hann leika einstaklega vel og skilur ekkert í því hve harðlega hann var gagnrýndur.