Ánægður með hugarfar Nistelrooy

Sir Alex Ferguson gaf sér í dag tíma til að hrósa hollenska framherjanum Ruud Van Nistelrooy fyrir hugarfar sitt og frammstöðu á æfingum með Manchester United undanfarna daga, en talið er öruggt að leikmaðurinn yfirgefi herbúðir liðsins á næstunni.

"Ruud hefur staðið sig vel á æfingum og hugarfar hans hefur verið mjög gott. Menn mega ekki gleyma því að hann er enn leikmaður Manchester United, þrátt fyrir allt," sagði Ferguson, sem segir félagið alls ekki vera orðið örvæntingarfullt þó lítið sé að gerast í leikmannamálum.

"Ef tímabilið hæfist á morgun og ég hefði alla þá menn sem ég hef til umráða ómeidda, myndi ég ekki hafa áhyggjur af neinu," sagði Ferguson, en Manchester United er enn orðað við miðjumanninn Michael Carrick hjá Tottenham.