Chelsea kærir fyrrum eiganda

Forráðamenn Englandsmeistara Chelsea hafa sent enska knattspyrnusambandinu formlega kvörtun vegna niðrandi ummæla og ásakana fyrrum eiganda félagsins Ken Bates í sinn garð. Bates er í dag eigandi Leeds United sem leikur í fyrstu deild.

Bates hefur sakað Chelsea um að lokka unga leikmenn til sín með óheiðarlegum hætti og sparaði ekki stóru orðin þegar hann hraunaði yfir sitt gamla félag. Forráðamenn Chelsea segja orð hans hafa borið vott um kynþáttafordóma og fordæma framkomu hans.