Auðvelt hjá Evrópumeisturunum

Evrópumeistarar Barcelona eru meistarar meistaranna á Spáni eftir öruggan 3-0 sigur á grönnum sínum í Espanyol í síðari leik liðanna í meistarakeppninni þar í landi. Deco skoraði tvö mörk í leiknum í kvöld, það síðara með glæsilegri hjólhestaspyrnu, og Xavi eitt. Eiður Smári Guðjohnsen spilaði síðari hálfleikinn með Barcelona, sem vann einvígið samanlagt 4-0.

Eiður Smári náði ekki að setja mark sitt almennilega á leikinn á meðan hann var inni á vellinum, en síðari hálfleikurinn var skiljanlega daufari en sá fyrri. Barcelona er nú Evrópumeistari, Spánarmeistari og getur í kvöld státað af því að vera meistari meistaranna.