Crouch getur slegið markametið

Steven Gerrard, leikmaður Liverpool og enska landsliðsins, hefur mikla trú á hinum leggjalanga félaga sínum Peter Crouch og segir hann hafa alla burði til að slá markametið með enska landsliðinu.

Goðsögnin Bobby Charlton er markahæsti leikmaður enska landsliðsins frá upphafi með 49 mörk, en Crouch hefur farið einstaklega vel af stað á landsliðsferli sínum og skoraði sitt 9. og 10. mark fyrir landsliðið í gær í 5-0 sigri Englendinga á hörmulega lélegu liði Andorra. Það verður að teljast nokkuð góður árangur í ljósi þess að Crouch spilaði sinn fyrsta landsleik í mars sl.

"Það er ótrúlegt að sjá hvað Peter er búinn að vera duglegur að skora fyrir enska landsliðið og við erum mjög ánægðir með hann. Ég er viss um að hann er ósáttur við að hafa ekki náð að skora sína aðra þrennu á stuttum tíma í gær, því hann fékk eitt gott tækifæri til þess. Ég veit að ef Peter fær góða þjónustu frá okkur hinum, mun hann halda áfram að skora grimmt því hann er frábær í að klára færin sín. Ég vona sannarlega að hann slái met Bobby Charlton einn daginn," sagði Gerrard.