Ég er tilbúinn að spila gegn Spurs

Enski framherjinn Alan Smith hjá Manchester United segist vera tilbúinn að koma inn sem varamaður með liðinu þegar það tekur á móti Tottenham í ensku úrvalsdeildinni á laugardaginn, en Smith hefur verið frá keppni í sjö mánuði eftir að hafa fótbrotnað illa í leik gegn Liverpool á síðustu leiktíð.

"Ef stjórinn myndi spyrja mig hvort ég væri tilbúinn að spila, yrði svar mitt afdráttarlaust já," sagði Smith, sem hefur spilað nokkra leiki með varaliði félagsins án þess að kenna sér meins. Alex Ferguson segir Smith enn ekki tilbúinn í heilan leik, en útilokar ekki að hann fái nokkrar mínútur sem varamaður.

"Ég sé hann ekki tilbúinn í 90 mínútur enn sem komið er, en vel má vera að hann fái tækifæri gegn Tottenham. Ef ekki þá, er alltaf möguleiki að hafa hann á bekknum gegn Celtic í meistaradeildinni í vikunni á eftir, því þar má hafa sjö varamenn," sagði Ferguson í samtali við Manchester Evening News.