Ætlar að auglýsa í Formúlu 1

Ramon Calderon segist hafa áform uppi um að gera auglýsingasamning við ónefnt keppnislið í Formúlu 1 á næsta keppnistímabili, þar sem bíllinn verði þakinn auglýsingum frá spænska knattspyrnufélaginu. Hann segist óska þess heitt að þessi bíll komi fyrstur í mark, því kappaksturinn fer sem kunnugt er fram í borg erkifjendanna - Barcelona.

"Ég get ekki gefið upp hvaða lið það er sem hér um ræðir, en til greina kemur að bíll í Formúlu 1 beri merki Real Madrid í einni eða tveimur keppnum á næsta ári - í það minnsta í Spánarkappakstrinum - og þá yrði það auðvitað rosalega sætt að sjá bíl merktan Real Madrid koma fyrstan í mark í Barcelona," sagði þessi yfirlýsingaglaði forseti.