Real Madrid býður í táning frá Argentínu

River Plate í Argentínu hefur hafnað 7 milljón punda tilboði frá Real Madrid í táninginn Gonzalo Higuain, sem þykir eitt mesta efnið í Argentínu um þessar mundir. Huguin er til sölu, en aðeins fyrir rétt verð.

"Við erum ekki mjög hrifnir af þessu verði og að sjálfsögðu viljum við heldur ekki missa Higuain um áramótin. Við viljum fá meiri pening og láta hann klára tímabilið hjá okkur," segir Mario Israel, framkvæmdastjóri River Plate.

Higuain þessi er 18 ára gamall og spilar í stöðu framherja. Hann er fæddur í Frakklandi en hefur búið í Argentínu frá eins árs aldri og hefur verið einn besti leikmaður River Plate síðasta árið þrátt fyrir ungan aldur.