Mourinho ætlar að spila til sigurs

Jose Mourinho segir sína menn í Chelsea ætla að sækja til sigurs gegn Werder Breen í Meistaradeildinni í kvöld, þó sigur gæti í raun orðið til þess að hjálpa erkifjendunum Barcelona að komast áfram upp úr riðlinum.

Chelsea er í efsta sæti A-riðilsins með 10 stig, Bremen hefur 7 stig og Barcelona aðeins 5 stig. "Maður tapar ekki leikjum nema kannski fyrir börnum sínum þegar maður er að leika við þau. Annars spilar maður alltaf til sigurs, sama hvort það er í Meistaradeildinni eða í vináttuleik. Maður verður að bera virðingu fyrir andstæðingum sínum og sjálfum sér með því að gera sitt besta og það er það sem við munum gera. Við ætlum okkur að reyna að vinna riðilinn og ér er nokkuð ánægður með frammistöðu liðsins í keppninni til þessa," sagði Mourinho.