Cannavaro meiddur eftir tæklingu samherja

Nýkjörinn knattspyrnumaður Evrópu, ítalski miðvörðurinn Fabio Cannavaro hjá Real Madrid, missir væntanlega af sínum þriðja leik í röð með félaginu eftir að hann meiddist á ökkla á æfingu liðsins í morgun. Cannavaro varð þá fyrir harkalegri tæklingu frá félaga sínum Ruud Van Nistelrooy og reiddist sá ítalski í kjölfarið og neitaði að taka í hönd félaga síns eftir æfinguna.

Cannavaro hafði nýverið náð sér af meiðslum sem héldu honum fyrir utan liðið í síðustu tveimur leikjum og nú þykir ljóst að hann muni missa af leik Real og Sevilla í deildinni um helgina.