Nistelrooy: Skil ekki hvernig við náðum ekki að vinna

Hollenski framherjinn Ruud van Nistelrooy hjá Real Madrid segir með ólíkindum að Barcelona skuli hafa sloppið með jafntefli í leik liðanna í spænsku úrvalsdeildinni, svo miklir hafi yfirburðir Real verið. Hetja heimamanna, Lionel Messi, segir að gærdagurinn muni seint líða honum úr minni.

"Ég get ekki útskýrt hvernig við náðum ekki að vinna þennan leik. Þetta er ótrúlegt, við stjórnum leiknum allan tímann og náðum forystunni þrisvar sinnum. Einhvern veginn misstum við þetta samt frá okkur. Ég skil það ekki," sagði Nistelrooy svekktur, en hann skoraði tvö marka Real.

Messi segir að það verði erfitt að gleyma leiknum í gær. "Og ég mun líklega aldrei gera það. Að skora þrjú mörk í svona leik er eitthvað sem ég hafði ekki leyft mér að dreyma um," sagði Messi við spænska fjölmiðla.