Samuel Eto'o gæti náð leiknum gegn Celtic

Samuel Eto'o verður ekki með Barcelona sem mætir Real Zaragoza um helgina en gæti náð leiknum gegn Celtic í 16-liða úrslitum Meistaradeildar Evrópu í næstu viku.

Eto'o meiddist í úrslitaleik Afríkukeppninnar um síðustu helgi er lið hans, Kamerún, tapaði fyrir Egyptalandi. Í ljós kom að hann tognaði aftan á læri.

Góðu fréttirnar eru hins vegar þær að vöðvinn rifnaði ekkert og því gæti hann orðið leikfær strax eftir helgi.

Barcelona mætir Celtic á útivelli í næstu vikur en þetta er fyrri viðureign liðanna í 16-liða úrslitunum.