Rijkaard er ánægður hjá Barcelona

Bróðir þjálfarans Frank Rijkaard hjá Barcelona segir hann ánægðan í herbúðum liðsins og blæs á slúðurfréttir ensku blaðanna um að Rijkaard muni taka við Chelsea ef Avram Grant nær ekki að skila titli eða titlum í hús í vor.

"Frank nýtur sín vel hjá Barcelona og er á sínu fimmta ári. Hann á eftir eitt ár hjá félaginu eftir þetta og vill klára það. Það er bara verið að slúðra um þetta á Englandi. Kannski vill Chelsea fá hann af því hann er drengur góður og góður þjálfari, en Frank er ekki maður sem fer á bak orða sinna," sagði Herman bróðir hans í samtali við Independent.