Saviola á leiðinni til Benfica

Einn af þeim leikmönnum sem búist er við að muni týnast í stjörnuflóðinu sem skolast hefur inn um dyr Real Madrid er framherjinn Javier Saviola og nú er útlit fyrir að Argentínumaðurinn sé á leiðinni til Portúgals á lánssamningi til Benfica.

Hinn 27 ára gamli Saviola kom til Real Madrid frá erkifjendunum í Barcelona á frjálsri sölu árið 2007 en hefur síðan þá ekki náð að festa sig í sessi hjá Madridingum.

„Javier er ekki inni í framtíðarplönum Real Madrid og Benfica hefur sýnt honum mikinn áhuga. Við erum í samningaviðræðum við Benfica og Real Madrid og lánssamningur virðist henta öllum aðilum eins og staðan er í dag. Javier vill finna sitt gamla leikform aftur frá þeim tíma sem hann sló í gegn með River Plate í Argentínu og hann telur að Benfica sé rétti staðurinn til þess að ná því fram," segir Diego Queiruga, umboðsmaður leikmannsins, í samtali við Record.