Heinze klár í El Clasico

Argentínski varnarmaðurinn Gabriel Heinze hjá Real Madrid hefur náð sér að fullu af meiðslum sínum og verður því klár með liði sínu í stórleikinn gegn Barcelona í spænsku deildinni næsta sunnudag.

Heinze æfði á fullu með Real í dag en slæmu fréttirnar eru þær fyrir Real að þeir Wesley Sneijder, Arjen Robben og Fernando Gago þurftu allir að æfa í tækjasalnum.

Þeir eiga allir við meiðsli að stríða. Robben er tæpur fyrir Barcelona-leikinn, Sneijder á ekki möguleika á að ná honum, en Gago á þokkalega möguleika á að ná heilsu.

Real Madrid getur minnkað forskot Barcelona á toppi deildarinnar niður í aðeins eitt stig með sigri á sunnudaginn og það myndi sannarlega hleypa lífi í titilbaráttuna á Spáni.