Xabi Alonso áttundu kaup Real Madrid í sumar

Spænski landsliðsmaðurinn Xabi Alonso er genginn í raðir Real Madrid frá Liverpool. Alonso stóðst í dag læknisskoðun hjá spænska félaginu en í gær komust félögin tvö að samkomulagi um kaupverð á miðjumanninum sem talið er nema um 30 milljónum punda.

Hinn 27 ára gamli Alonso fór beinustu leið á æfingu á Santiago Bernabéu eftir læknisskoðunina og búist er við því að hann skrifi formlega undir samning við félagið í dag.

Alonso er áttundi leikmaðurinn sem Madridingar kaupa í sumar eftir að Florentino Perez tók við forsetaembættinu á Bernabéu en heildar kaupverðið á þessum leikmönnum er sagt nema um 215 milljónum punda.