Messi vill fá Mascherano og Fabregas til Barca

Argentínski snillingurinn Lionel Messi hjá Barcelona hefur ákveðnar hugmyndir um hvernig félagið geti haldið áfram á beinu brautinni á næsta tímabili eftir ótrúlegt þrennu tímabil þar sem félagið vann deild og bikar á Spáni auk þess að vinna Meistaradeildina.

Messi telur að landi sinn Javier Mascherano hjá Liverpool væri kjörin viðbót við stjörnumprýddan leikmannahóp Börsunga og þá væri leikmaður eins og Cesc Fabregas alltaf velkominn á Nývang en báðir leikmenn hafa verið sterklega orðaðir við Katalóníufélagið.

„Við vorum stórfenglegir á síðustu leiktíð og við vonumst til þess að endurtaka leikinn aftur á þeirri næstu. Ef að leikmenn eins og Mascherano og Fabregas sem hafa verið orðaðir við Barcelona myndu koma þá held ég að við yrðum enn sterkari og nánast ósigrandi.

Mascherano væri frábær hjá Barcelona því hans vinnuframlag myndi nýtast liðinu vel og það sama gildir í raun um Fabregas því hann myndi spila fyrir liðið. Þannig leikmenn eru alltaf velkomnir til Barcelona," segir Messi í samtali við Sport á Spáni.