Gjaldmiðlaórói veldur uppsveiflu á gullverði

Mikil uppsveifla hefur verið á gullverðinu undanfarnar vikur og í gærkvöldi fór það upp í tæpa 1.430 dollara fyrir únsuna. Í morgun hafði það aðeins gefið eftir og stóð í 1.423 dollurum á únsuna. Órói á gjaldmiðlamörkuðum veldur þessari uppsveiflu en fjárfestar eru í auknum mæli að missa trúnna á pappírspeninga hvort sem það eru dollarar eða evrur.

Fjallað er um málið á Bloomberg fréttaveitunni. Þar kemur fram að tvennt valdi óróanum á gjaldmiðlamörkuðum. Annarsvegar orð Ben Bernanke seðlbankastjóra Bandaríkjanna í þættinum 60 Minutes á sunnudagkvöld um að örva þyrfti bandarískt efnahagslíf enn frekar. Þar á Bernanke við að bæta þurfi við fyrirhugaða 600 milljarða dollara sem ætlaðir eru til skuldabréfakaupa.

Fari svo að seðlaprentvélar Bandaríkjanna verði settar í hærri gír eins og seðlabankastjórinn vill mun það aðeins leiða til veikingar á gengi dollarans.

Hin ástæðan er sú mikla óeining sem komin er upp milli ríkja ESB um hvernig taka eigi á skuldakreppunni. Margar tillögur um það komu fram á toppfundi leiðtoga sambandsins í gærdag. Þær voru síðan allar skotnar í kaf af Angelu Merkel kanslara Þýskalands. Hún er t.d. mjög fráhverf því að stækka neyðarsjóð ESB umfram núverandi stærð. Þetta telja fjárfestar að geri skuldakreppuna dýpri en hún er og auki hættuna á að Spánn og Ítalía sogist inn í hana.