Hagkerfi í ESB að ná sér

Nýjar hagtölur af Evrusvæðinu og aðildarríkjum Evrópusambandsins eru til vitnis um að horfurnar eru góðar í Evrópu og að hagkerfi ESB eru nú mörg hver óðum að ná sér eftir fjármálakreppuna, segir Greining Íslandsbanka í nýju Morgunkorni.

Þar kemur fram að samkvæmt Eurostat var hagvöxtur á evrusvæðinu og í öllum 27 aðildarríkjum ESB 1% á milli fyrsta og annars ársfjórðungs í ár og er það í samræmi við bráðabirgðatölur sem voru birtar fyrir tæpum mánuði síðan. Þetta er mesti vöxtur sem sést hefur á milli fjórðunga í 3 ár og mun meiri vöxtur en í hinum stóru hagkerfunum fyrir sama tímabil. Þannig var 0,4% hagvöxtur á milli fyrsta og annars fjórðungs þessa árs í Bandaríkjunum og 0,1% hagvöxtur fyrir sama tímabil í Japan. Hagvöxtur á milli annars fjórðungs þessa árs og sama fjórðungs árið 2009 mældist 1,9% fyrir bæði Evrusvæðið og öll aðildarríki ESB. Þetta er meiri vöxtur en hafði verið gert ráð fyrir í bráðabirgðatölum Eurostat. Þá voru tölur um hagvöxt á fyrsta fjórðungi ársins frá fyrri fjórðungi uppfærðar til betri vegar og mælist hann nú 0,3% og 0,8% sé miðað við annan ársfjórðung fyrra árs.

Greining Íslandsbanka segir að hagvöxt á evrusvæðinu megi meðal annars rekja til viðsnúnings í Þýskalandi, en landsframleiðsla í Þýskalandi jókst um 2,2% á öðrum ársfjórðungi frá fyrri fjórðungi og hefur ekki aukist jafn mikið í áratugi.