Gullöld tekur við af olíuævintýrinu í Noregi

Ný gullöld, bókstaflega talað, mun taka við af olíuævintýrinu í Noregi þegar olíuna þrýtur undan ströndum landsins. Norsk stjórnvöld hafa ákveðið að verja 100 milljónum norskra kr. eða um 2 milljörðum kr. til gulleitar í norðurhluta landsins á næstu fjórum árum.

Fjallað er um málið á börsen.dk. Þar kemur fram að sérfræðingar telja að mikið magn af gulli sé til staðar í Norður Noregi. Þannig telur Trond Giske viðskiptaráðherra Noregs að gullið muni vera það sem Norðmenn lifi af í framtíðinni.

„Eftir tíu til fimmtán ár mun gull verða hin nýja olía í Noregi," segir ráðherrann.

Jarðfræðirannsóknarstöð Noregs í Þrándheimi styður skoðanir ráðherrans. Sérfræðingar þar telja að í Noregi sé að finna álíka mikið af verðmætum málmum og í Svíþjóð, Finnlandi og Rússlandi.

Það er hinsvegar stórt ljón í veginum. Samar sem búa í norðurhluta Noregs og lifa af hreindýrarækt vilja ekki sjá námugröft í sínu landi. Giske er hinsvegar sannfærður um að leysa megi það vandamál þar sem nútíma námugröftur hefur ekki í för með sér jafnmikið jarðrask og áður.