Nígeríumaður vill hlut í Arsenal

Nígerískur auðjöfur að nafni Aliko Dangote á í viðræðum um kaup á 16% hlut í enska knattspyrnuliðinu Arsenal. Hluturinn sem er til sölu er í eigu Lafði Ninu Bracewell-Smith, en hún er fjórði stærsti hluthafinn í knattspyrnufélaginu. Hlutur Bracewell Smith er metinn á 96 milljónir sterlingspunda eða rúmar 15 milljarðar íslenskra króna. Breska blaðið Sunday Times segir hins vegar að hún vilji fá 160 milljónir punda fyrir hlutinn. Það jafngildir 26 milljörðum íslenskra króna.

Salan á þessum hlut gæti haft úrslitaáhrif á eignarhald í félaginu því að tveir stærstu hluthafar í félaginu, Stan Kroenke og Rússinn Alisher Usmanov hafa einnig áhuga á að kaupa hann. Hreppi þeir hlutinn af Bracewell-Smith verður þeim skylt að taka knattspyrnufélagið yfir að fullu.

Sunday Times segir að markaðsverðmæti Arsenal nemi rúmum 600 milljónum sterlingspunda eða 96 milljörðum íslenskra króna. Gera má ráð fyrir að fleiri ensk stórlið verði seld í sumar því að eigendur Liverpool hafa lýst yfir vilja til að selja félagið. Þá hefur verið unnið að því að leggja fram tilboð í Manchester United sem nú er í eigu Glazer fjölskyldunnar.