Mikið magn af vopnum fannst á hafnarsvæði Mærsk í Lagos

Tollverðir í Lagos í Nígeríu hafa fundið mikið magn af vopnum á hafnarsvæði danska skipafélagsins A.P. Möller-Mærsk í borginni. Um er að ræða 13 gáma sem fullir eru af sprengjuvörpum, handsprengjum og skotfærum.

Hafnarsvæðið, Apapa-terminal, er í eigu Mærsk en fjöldi annarra skipafélaga nýtir það. Þannig hefur verið upplýst að gámarnir voru fluttir til Apapa af franska skipafélaginu CMA CGM í júlí s.l. og ætlaði CMA CGM að flytja þá þaðan aftur. Gámarnir voru þó enn á svæðinu þegar tollverðir létu til skarar skríða og fundu vopnin í þessari viku.

Samkvæmt frétt í blaðinu Nigerian Tribune er talið að vopnasending þessi hafi komið frá Íran og að hana átti að senda til Hamas hreyfingarinnar á Gaza svæðinu.

Í frétt í Jyllands Posten um málið er haft eftir Tom Boyd fjölmiðlafulltrúa hjá Mærsk að skipafélagið vinni að sjálfsögðu með tollyfirvöldum í Nígeríu að rannsókn sem nú er hafin í málinu. Hann tekur fram að Apapa hafi aðeins verið umskipunarstaður á vegum franska skipafélagsins fyrir þessa gáma.