Þrjátíu milljarða evra neyðarlán

Evrópusambandið (ESB) hefur boðist til að lána Grikklandi allt að 30 milljarða evra með um fimm prósenta vöxtum á þessu ári til að létta á gríðarlegum fjárhagsvanda landsins. Gengi evrunnar hefur styrkst töluvert í morgun í kjölfar þessarar ákvörðunnar.

Að sögn Olli Rehn, efnahags- og fjármálastjóra ESB, er Alþjóðagjaldeyrissjóðurinn einnig tilbúinn til að lána Grikkjum um tíu milljarða evra. Til þess að fá lánin þurfa Grikkir að sækja formlega um þau, sem þeir eiga enn eftir að gera.

Ráðamenn hjá ESB og Alþjóðagjaldeyrissjóðnum munu hittast í dag til að ræða frekar um lánafyrirkomulagið.

Stutt er síðan alþjóðlega matsfyrirtækið Fitch lækkaði lánshæfiseinkunnir Grikklands niður í lægsta flokk með neikvæðum horfum.

Stjórnvöld á Grikklandi hafa síðustu vikur unnið að undirbúningi skuldabréfaútboðs til að afla 11,6 milljarða evra, jafnvirði um tvö þúsund milljarða króna, fyrir maílok til að standa við skuldbindingar hins opinbera.

Erfiðleikar í grísku efnahagslífi valda því að fjárfestar krefjast nú tvöfalt hærri ávöxtunar á bréfin en Þjóðverjar greiða fyrir þýsk ríkisskuldabréf um þessar mundir.

Bloomberg-fréttaveitan hefur eftir George Papandreou, forsætisráðherra Grikklands, að ekki megi útiloka að sækja verði um alþjóðlega neyðaraðstoð. - jab