Bíll til sölu: Staðalbúnaður er radar, reykvörn og vélbyssur

Sögufrægur bíll fer á uppboð í þessari viku. Meðal staðalbúnaðar í honum eru radar, reykvörn, nagladreifari og tvær vélbyssur.

Bíllinn sem hér um ræðir er af gerðinni Aston Martin Silver Birch DB5. Fyrri eigandi hans var ofurhetjan James Bond en bíllinn var fararskjóti Bond í myndunum Goldinger og Thunderball.

Núverandi eigandi er Jerry Lee sem rekur útvarpsstöðvar í Philadelpiu í Bandaríkjunum. Lee keypti bílinn eftir að tökum á myndinni Thunderball lauk fyrir rúmlega 40 árum síðan og ók honum beint inn í bílskúr sinn. Þar hefur hann staðið síðan og hefur Lee aldrei keyrt hann frá þessum tíma. Það fylgir því sögunni að bíllinn er lítið keyrður.

Í frétt um málið í Wall Street Journal segir að Lee hafi borgað 12.000 dollara á sínum tíma fyrir þennan Aston Martin en búist er við að hann verði seldur á nokkrar milljónir dollara eða nokkur hundruð milljóna króna í dag.

Austin Martin af þessari gerð var síðast seldur árið 2006 og fengust þá rúmlega tvær milljónir dollara fyrir hann. Sá hafði hinsvegar ekki komið fram í Bond mynd og var ekki með þeim staðalbúnaði sem Q setti í þennan bíl.