Líbýa gæti aukið olíuhagnað Norðmanna um 2.000 milljarða

Ástandið fyrir botni Miðjarðarhafs gerir það að verkum að Norðmenn sjá fram á um 2.000 milljarða króna hagnað af olíusölu sinni í ár umfram fyrirliggjandi áætlanir.

Fjallað er um málið í blaðinu Verdens Gang. Þar segir að áætlanir norska stjórnvalda fyrir árið í ár gerðu ráð fyrir að olíuverðið myndi verða um 86 dollara á tunnuna að meðaltali. Verðið er þegar komið yfir 110 dollara og hefur raunar ekki farið undir 90 dollara frá áramótum.

Jan Andreassen aðalhagfræðingur Terra gruppen hefur reiknað út að ef olíuverðið verði 108 dollarar á tunnuna hafi það í för með sér að vöruskipti lands verði hagstæðari sem nemur 100 milljörðum norskra króna eða um 2.000 milljörðum króna.

Þessi upphæð samsvarar því að hver Norðamaður fengi 20.000 norskar krónur eða um 400.000 krónur aukalega í vasann eftir árið.

Þar að auki bendir Andreassen á að nær helmingur af skráðum félögum í norsku kauphöllinni tengist olíuframleiðslunni á einn eða annan hátt og ættu því að skila vænum afgangi eftir árið.