Exxon Mobil leitar olíu við Færeyjar

Exxon Mobil, stærsta olíufélag heims, hefur ákveðið að hefja olíuleit undan ströndum Færeyja. Bandaríski olíurisinn hefur í því skyni samið við Statoil um að kaupa helmingshlut í þremur leitarleyfum, sem norska olíufélagið hefur fengið úthlutað í færeyska landgrunninu.

Stjórnvöld í Færeyjum hafa samþykkt að hluti leitarleyfa Statoil flytjist með þessum hætti yfir til Exxon Mobil, en þeim var úthlutað á árunum 2000 og 2005. Færeyska félagið Atlantic Petrolium á eins prósents hlut í einu þessara leyfa. Félögin þrjú hyggjast standa saman að olíuleit við Færeyjar og áforma að bora fyrstu sameiginlegu rannsóknarholuna síðar á þessu ári. Áður hafði Statoil borað tvær holur undan ströndum eyjanna.

Í viðtali við norskan vefmiðil kveðst yfirmaður olíuleitar Statoil, Tim Dodson, mjög ánægður að fá svo hæfan og reyndan samstarfsaðila sem Exxon Mobil inn á þetta lítt kannaða svæði. Hann segir að bæði Statoil og Exxon Mobil hafi víðtæka reynslu af olíuleit á erfiðum hafsvæðum. Talsmaður Exxon Mobil, Russ Bellis, segir félagið hlakka til að vinna með Statoil, Atlantic Petrolium og færeyskum stjórnvöldum við að kanna þau tækifæri sem þarna séu í olíuleit.