Kaupþing ætlar að selja Karen Millen

Skilanefnd/slitastjórn Kaupþings ætlar sér að skilja tískuverslanakeðjuna Karen Millen frá Aurora Fashions og selja hana sér. Þetta kemur fram í frétt um málið á Bloomberg fréttaveitunni.  Karen Millen er sá hluti Aurora sem skilað hefur hvað mestum hagnaði innan samsteypunnar sem telur einnig Coast, Oasis og Warehouse.

Kaupþing fer með 90% eignarhlut í Aurora Fashions Group en stjórnendur samsteypunnar eiga 10% í henni.

Karen Millen sem sérhæfir sig í dýrum kvenfatnaði var með tekjur upp á 250 milljónir punda, eða rúmlega 47 milljarða kr.  á síðasta ári og kom 60% sölunnar frá verslunum utan Bretlandseyja.

Á Bloomberg segir að með í sölunni á Karen Millen myndi fylgja 20 milljón punda lánalína til þess að keðjan gæti aukið markaðssetningu sína í löndum á borð við Kína, Mexíkó, Kanada og Ítalíu. Sem stendur rekur Karen Millen 91 verslun á Bretlandseyjum og 220 verslanir í öðrum löndum.

Mosaic Fashions hf. sem áður átti Aurora Fashions var lýst gjaldþrota fyrir tveimur árum. Þá skuldaði Mosaic Kaupþing um 450 milljónir punda eða um 85 milljarða kr.