Viðskipti með hluti í írskum bönkum stöðvuð

Búið er að taka ákvörðun um að stöðva viðskipti með hluti í bönkunum Bank of Ireland og Allied Irsh Bank á markaðinum í Dublin í dag. Þetta kemur fram í tilkynningu frá seðlabanka landsins. Eftir lokun markaðarins í dag verða birtar niðurstöður álagsprófa á írsku bankana.

Í tilkynningunni segir að ákvörðunin sé tekin til þess að koma í veg fyrir ónauðsynlegar markaðssveiflur sem myndu orsakast um orðrómi um niðurstöður álagsprófanna.

Áður hefur komið fram að írsk stjórnvöld gætu neyðst til þess að taka yfir ráðandi hlut í Bank of Ireland og Irsh Life & Permanent í kjölfar birtingar á álagsprófunum. Þar með væru írsk stjórnvöld komin með ráðandi hlut í öllum innlendum bönkum Írlands.

Fjallað er um málið á Bloomberg fréttaveitunni.  Þar segir að álagsprófið muni skera úr um hvort fyrrgreindir tveir bankar lendi í sömu örlögum og fjórir aðrir af stærstu bönkum landsins.

Samkvæmt áliti tíu greinenda sem Bloomberg leitaði til eru allar líkur á að írsk stjórnvöld muni krefjast þess að bankar landsins útvegi sér 27,5 milljarða evra, eða tæplega 4,500 milljarða kr., í auknu eiginfé. Stjórnvöld hafa lofað bönkunum að leggja þeim til eiginfé ef þeir geta ekki aflað þess sjálfir.