Walker talinn líklegasti kaupandi Iceland

Malcolm Walker forstjóri Iceland Foods verslunarkeðjunnar er talinn líklegasti kaupandi hennar en stefnt er að sölu keðjunnar í ár. Eins og fram hefur komið í fréttum virðist töluverður áhugi á því að kaupa Iceland og er 1,5 milljarður punda, eða rúmlega 280 milljarðar kr. nefndur sem kaupverðið.

Fjallað er um málið á vefsíðunni thegrocer. Þar er nefnt til sögunnar að þótt skilanefnd Landsbankans ráði yfir rúmlega 66% hlut í Iceland, og Walker og stjórnendur keðjunnar 23%, eigi Walker rétt á að ganga inn í hvaða tilboð sem berst í Iceland.

The Grocer hefur eftir háttsettum heimildarmanni í fjármálaheimi London, The City, að Walker sé líklegasti kaupandinn að Iceland eins og staðan sé í dag. Þessi heimildarmaður segir að menn hljóti að velta því fyrir sér af hverju fjárfestir/kaupandi hafi áhuga á að fara í gegnum allt söluferlið ef að Walker geti svo komið í lokin, jafnað kauptilboðið og gengið á brott með Iceland í vasanum.

Þá kemur fram í máli þessa heimildamanns að sennilega hefjist söluferlið á Icelandi ekki af alvöru fyrr en í september og muni standa í nokkra mánuði.

The Grocer nefnir þá aðila sem helst koma til greina sem kaupendur að Iceland, auk Walker. Þetta eru Morrison verslunarkeðjan sem þegar hefur lýst yfir áhuga sínum.  Verslunarkeðjan Asda hefur einnig verið nefnd til sögunnar og Sainsbury mun hafa áhuga á einhverjum eignum Iceland. Hinsvegar telja sérfræðingar að samkeppnisreglur komi í veg fyrir að Tesco geti keypt Iceland.