Eigandi IKEA er auðugasti íbúi Sviss

Ingvar Kamprad eigandi IKEA er auðugasti íbúi Sviss samkvæmt nýjum lista sem tímaritið Bilanz hefur tekið saman um 300 auðugustu íbúa landsins. Samkvæmt Bilanz nemur auður Kamprad 38 milljörðum svissneskra franka eða sem svarar til tæplega 4.600 milljarða kr.

Listi Bilanz er hlaðinn nöfnum innlends sem erlends viðskiptafólks sem fæst eru kunnug hér á Íslandi. Þó má þekkja þar nokkra fræga einstaklinga.

Formúlu 1 ökuþórinn Michael Schumacher er í 124. sæti listans en auðæfi hans eru metin á 850 milljónir svissneskra franka og tónlistarmaðurinn Phil Collins er einnig á listanum, í 215. sæti með auðæfi upp á 225 milljónir svissneskra franka.