Banna brask með skuldatryggingar

Evrópuþingið hefur samþykkt löggjöf þar sem settar eru þröngar skorður við þeim viðskiptum sem sætt hafa hvað mestri gagnrýni í kjölfar efnahagskreppunnar, þ.e.a.s. skuldatryggingar ríkisskulda annars vegar og skortsölur hlutabréfa hins vegar.

Samkvæmt samþykkt Evrópuþingsins mega þeir einir kaupa sér skuldatryggingar vegna ríkisskulda sem hafa lánað viðkomandi ríki fjármuni eða eru eigendur verðbréfa sem talin eru nátengd greiðsluhæfi þess ríkis.

Ríki Evrópusambandins þurfa að staðfesta löggjöfina áður en hún tekur gildi.

Nái lögin fram að ganga er talið að þau fari langt með að binda endi á spákaupmennsku með skuldatryggingar Evrópuríkja, segir á vef Euobserver.

Þá hefur Evrópuþingið samþykkt að herða reglur um skortsölur. Taki þau gildi verða frestir til þess að loka skortstöðum þrengdir verulega og háar sektir lagðar við brotum á reglunum.- pg